Creat Shráidbhaile agus Chladach Bhóthar na Trá

Is ceantar bríomhar cois farraige é Bóthar na Trá a bhfuil cáil air mar gheall ar an bpromanáid fhada, na háiseanna áineasa éagsúla sa cheantar agus spiorad láidir an phobail áitiúil. De bharr go bhfuil Cathair na Gaillimhe ag fás agus ag méadú i gcónaí, deis thráthúil a bheidh sa tionscadal seo chun fís shainiúil, fhadtéarmach a mhúnlú do Bhóthar na Trá. Treoireoidh Creatphlean Shráidbhaile agus Chladach Bhóthar na Trá forbairt an cheantair amach anseo. Trí phróiseas comhairliúcháin agus rannpháirtíochta poiblí a mhairfidh ar feadh tréimhse bliana, tá sé mar aidhm againn aghaidh a thabhairt ar roinnt saincheisteanna lena n-áirítear feabhas a chur ar spásanna agus áiseanna poiblí, inrochtaineacht níos fearr a sholáthar agus a bheith ag tacú le hinbhuanaitheacht agus le gníomhú ar son na haeráide. Féachtar leis an bplean le féiniúlacht agus carachtar uathúil Bhóthar na Trá a fheabhsú. Tá sé mar aidhm ag an bPlean fís a bhunú a thacóidh le hathléimneacht agus le rathúnas, ina n-aithneofar deiseanna chun aghaidh a thabhairt ar na dúshláin a bhaineann le hathrú aeráide agus le híogaireacht comhshaoil. Cuirfimid cónaitheoirí agus gnólachtaí áitiúla ag croílár an phróisis, sa chaoi is go gcruthófar todhchaí inbhuanaithe agus ionchuimsitheach do Bhóthar na Trá faoin gcreat. Cuimsítear sa limistéar staidéir an Sráidbhaile, Ionad Leisureland, na páirceanna in aice láimhe agus an Cladach ó Thrá Grattan go Túr Tumadóireachta na Carraige Duibhe

about


Cad a bhainfear amach faoin gCreatphlean? 

Tá carachtar agus beocht ar leith ag baint le sráidbhaile Bhóthar na Trá. Is ionad tráchtála é, is ceann scríbe do chuairteoirí é agus tá roinnte saoráidí fóillíochta agus áineasa éagsúla sa gceantar. Tá an-chuid tréithe agus úsáidí traidisiúnta a shamhlaítear le ceantair shaoire cois farraige le fáil i mBóthar na Trá fós, amhail saoráidí siamsaíochta, caiféanna, bialanna agus réimse lóistín agus nithe is díol spéise do thurasóirí.

Mar aitheantas ar an tábhacht a bhaineann le sráidbhaile agus le cladach Bhóthar na Trá do shaol na cathrach, agus ar thábhacht na timpeallachta cósta, sonraítear polasaí i bPlean Forbartha Chathair na Gaillimhe 2023 -2029 chun straitéis a ullmhú d’fhorbairt fhadtéarmach agus d’fheabhsú charachtar shráidbhaile agus phromanáid Bhóthar na Trá.  

Plean fadtéarmach a bheidh i gCreatphlean Shráidbhaile agus Chladach Bhóthar na Trá lena dtabharfar faoi na nithe seo a leanas: 

  • Fís chomhroinnte a bhunú do Shráidbhaile agus do Chladach Bhóthar na Trá 

  • Feabhsú, bainistiú, úsáid agus forbairt Bhóthar na Trá agus an chladaigh a threorú

  • Cur chuige comhtháite a chumasú maidir le Bóthar na Trá agus an cladach a fhorbairt agus a bhainistiú amach anseo 

Beidh an tionscadal ar siúl i rith 2025 agus beidh an pobal áitiúil páirteach ann chun cabhrú linn réimsí tosaíochta do Bhóthar na Trá a aithint. Déanfaidh Comhairle Cathrach na Gaillimhe, i gcomhar leis na hailtirí agus dearthóirí uirbeacha Allies and Morrison, breithniú ar réimse ábhar lena n-áirítear na nithe seo a leanas: 

  • Muintir na háite
  • Gnólachtaí na háite
  • An timpeallacht nádúrtha
  • An cladach, agus saoráidí trá agus fóillíochta
  • Sláinte agus folláine
  • Carachtar, féiniúlacht agus dearadh na háite
  • Úsáidí an tsráidbhaile, spásanna poiblí, sráideanna agus an phromanáid
  • Cúrsaí turasóireachta
  • Cúrsaí inbhuanaitheachta
  • An t-athrú aeráide
  • Gluaiseacht agus taisteal
     

Cén uair is féidir liom a bheith páirteach?   

Cuirfear tús leis na chéad imeachtaí rannpháirtíochta i mí Feabhra, agus beidh tuilleadh deiseanna rannpháirtíochta ann i rith 2025. Is é an toradh deiridh a bheidh ar an obair seo ná creatphlean a chruthú a chuideoidh linn todhchaí Bhóthar na Trá a mhúnlú.