Osclaíonn Lána an Mhuilleora don Phobal

Tá oibreacha críochnaithe anois ar Uasghrádú Lána an Mhuilleora, a sholáthraíonn nasc do choisithe agus do rothair idir Bóthar Rathúin, Bóthar Dáileacháin an Iarthair agus Bóthar Bhaile an Rí, a nascann na ceantair chónaithe agus na taitneamhachtaí éagsúla sa cheantar. Déanfaidh an t-uasghrádú ar Lána an Mhuilleora a críochnaíodh le déanaí:

·           Bealaí siúlóide agus rothaíochta easbhóthair a sholáthar do chónaitheoirí, agus do leanaí a thaistealaíonn ar scoil;

·           Feabhas a chur ar an tréscaoilteacht idir Bóthar Ráthún, Céide an Mhainéir agus na ceantair máguaird; agus

·           Spásanna oscailte ilghnéitheacha agus feidhmiúla a chruthú le haghaidh siúlóide, rothaíochta agus súgartha.

Ba é an tÚdarás Náisiúnta Iompair a mhaoinigh an tionscadal seo.

Dúirt Micheal Cormican, Innealtóir Feidhmiúcháin le Comhairle Cathrach na Gaillimhe “Aithníonn an dearadh íogaireacht éiceolaíoch an bhealaigh agus soláthraíonn sé do bhithéagsúlacht – flóra agus fána. Tá féar agus bláthanna fiáine curtha i limistéir de na páirceanna feadh Lána an Mhuilleora, agus déanfar iad a bhainistiú ar mhaithe le pailneoirí, ialtóga agus speicis eile. Mar sin déantar riachtanais úsáideoirí an bhealaigh a chothromú le tacaíocht na bithéagsúlachta”.

Áiríonn an scéim chríochnaithe soilsiú feadh an bhealaigh, agus trasrianta coisithe ag Gort na Bró agus Bóthar Rathúin chun nascacht a fheabhsú. Nascann Lána an Mhuilleora le Líonra Rothaíochta Chathair na Gaillimhe níos leithne, ag tacú le taisteal gníomhach lasmuigh de cheantar Chnoc na Cathrach/Ráthún, agus tacaíonn sé le rochtain ar ghréasán bus na Gaillimhe.

Tá sé mar aidhm ag an bplandáil feadh Lána an Mhuilleora rath na speiceas bithéagsúlachta a chur chun cinn agus a spreagadh go gníomhach laistigh den láithreán agus comhtháthú mar chuid de na córais chomhshaoil ​​casta agus i bhfad níos leithne.

Tógann dearadh an tírdhreachaithe inspioráid ó lánaí tuaithe Chonamara, agus úsáid á baint as na ballaí cloiche atá ar an lána, cuireann speicis dúchasacha bláthanna fiáine agus féir mothú tuaithe ar fáil i suíomh uirbeach. Roghnaíodh plandú crann le stoc dúchasach, rud a léiríonn na speicis sin a fheictear go minic faoi chosaint na mballaí i dtírdhreach Chonamara.