Sheol Seán Canney, T.D., Aire Stáit sa Roinn Forbartha Tuaithe agus Pobail agus sa Roinn Comhshaoil, Aeráide agus Cumarsáide, agus ionadaithe ó Coláiste na Tríonóide, Baile Átha Cliath, hOllscoil Teicneolaíochta an Atlantaigh (ATU), BSL, Enterprise Car Club agus Comhairle Cathrach na Gaillimhe, ag seoladh an chéad cheann de cheithre eMol comhroinnte inniu i gCarrchlós Leabharlann an Taoibh Thiar i gcroílár an chreasa dícharbónaithe i gCathair na Gaillimhe.
Osclófar eMoil breise i nDún Droma, i Leitir Ceanainn agus i bPort Láirge sna míonna atá amach romhainn freisin.
Ligfidh na suíomhanna eMol do dhaoine an modh iompair is oiriúnaí dá gcuid riachtanas a roghnú, agus é mar aidhm acu raon roghanna taistil phoiblí comhroinnte a chur ar fáil. Cuideoidh sé daoine a spreagadh chun triail a bhaint as roghanna taistil éagsúla agus iad ag taisteal chun na hoibre nó ag dul timpeall na cathrach trí réitigh mhalartacha a chur ar fáil dóibh.
Beidh stáisiún luchtaithe BSL chun na feithiclí leictreacha comhroinnte a luchtú i ngach ceann de na suíomhanna eMol saintógtha seo, chomh maith le rothar leictreach lasta amháin agus ceithre rothar leictreacha. Tá an dá fheithicil leictreacha comhroinnte curtha ar fáil ag Enterprise Car Club agus tá siad ar fáil le cur in áirithe ag an bpobal de réir na huaire nó de réir an lae, chun freastal ar réimse riachtanas taistil.
Tá an tionscadal seo maoinithe ag Údarás Fuinnimh Inmharthana na hÉireann faoi Chlár Maoinithe um Thaighde, Forbairt agus Taispeántas SEAI 2022 (uimhir dheontais 22/RDD/840) agus tá sé á stiúradh ag Coláiste na Tríonóide, Baile Átha Cliath.
Tá na eMoil mar chuid de straitéis níos leithne in Éirinn chun úsáid phoiblí iompair chomhroinnte a spreagadh, chun cabhrú le brú tráchta agus fadhbanna páirceála i gcathracha a laghdú, agus chun spriocanna astaíochtaí a bhaint amach. Aithnítear soghluaisteacht chomhroinnte níos mó agus níos mó mar réiteach praiticiúil ar na dúshláin a bhaineann le forbairt uirbeach agus cúrsaí comhshaoil.
Dúirt an tOllamh Brian Caulfield, ceannaire tionscadail, ó Scoil na hInnealtóireachta i gColáiste na Tríonóide: “Tá an mol nua seo i nGaillimh ar cheann de na chéad mhoil dá leithéid in Éirinn agus an chéad cheann de cheithre cinn a sheol ár dtionscadal, agus tá cinn eile le teacht i Leitir Ceanainn, i bPort Láirge agus i mBaile Átha Cliath níos deireanaí sa bhliain. Scrúdófar inár dtaighde conas is féidir leis na moil seo rogha eile a chur ar fáil, in ionad gluaisteán príobháideach a bheith agat, ag gach ceann dár gceithre ionad tástála. Déanfaidh muid tomhas freisin ar na hastaíochtaí, an costas agus an coigilteas ama a thagann ó na roghanna soghluaisteachta comhroinnte seo a úsáid ag gach ceann de na moil.”
Dúirt Donal Phelan, Ceannasaí Nuálaíochta, Grúpa BSL: “Déanann muid ár ndícheall i gcónaí féachaint ar acmhainneacht na teicneolaíochta nua chun sprioc BSL Neodracht a bhaint amach faoi 2040 trí thrí phríomhchuspóir: fuinneamh a dhícharbónú, bonneagar acmhainneach a thógáil agus custaiméirí a spreagadh chun maireachtáil ar bhealach níos inbhuanaithe. Tá ár dtiomantas don inbhuanaitheacht agus don nuálaíocht i gcroílár an mhoil phíolótaigh seo. Agus muid ag obair le príomhchomhpháirtithe chun an scéim phíolótach seo a chur i gcrích, cinntíonn sé go bhfuil muid ag obair le chéile i dtreo todhchaí uirbeach níos glaine, níos glaise agus níos nasctha.”
Dúirt an tUasal Leonard Cleary, Príomhfheidhmeannach Chomhairle Cathrach na Gaillimhe: “Is cuid cinniúnach é an tionscadal seo inár n-iarrachtaí leanúnacha aghaidh a thabhairt ar athrú aeráide agus caighdeán na beatha a fheabhsú do gach duine i nGaillimh. Ní hamháin go bhfuil an mol soghluaisteachta leictrí ar an gcéad cheann don chathair seo ach is cuid ríthábhachtach dár straitéis é chun astaíochtaí a laghdú agus réitigh soghluaisteachta inbhuanaithe a chur chun cinn agus muid ag obair i dtreo spriocanna uaillmhianacha aeráide na hÉireann. Seans go bhfuil teaghlaigh nó daoine aonair sa chathair ag bainistiú an chostais a bhaineann le carranna a bheith acu, nó ag smaoineamh ar an dara carr a cheannach – tugann an scéim phíolótach seo deis do dhaoine triail a bhaint as rothar leictreach, rothar leictreach lasta agus carr leictreach le fáil amach conas a d'fhéadfadh na roghanna seo páirt a ghlacadh ina riachtanais iompair – chomh maith leis na roghanna a bhaineann le hiompar poiblí agus a bheith ag siúl – sula gceannaíonn siad carr nua. Tá Comhairle Cathrach na Gaillimhe agus na daoine a bhfreastalaíonn sí orthu fós ar thús cadhnaíochta i nGníomhú ar son na hAeráide agus léiríonn an tionscadal seo a tiomantas d'athrú dearfach agus a spriocanna gníomhaíochta aeráide 2030 a bhaint amach.”
Dúirt an Dr Amaya Vega, comhpháirtí tionscadail, Scoil Ghnó ATU: “Is céim nua é an mol seo i dtreo soghluaisteachta inbhuanaithe inár gceantar agus tá lúcháir orainn a bheith inár gcomhpháirtithe acadúla, ag cur lenár gcumas taighde i modhanna iompair, agus ag soláthar léargais luachmhair maidir le hiompar taistil, éifeachtúlacht modhanna iompair, agus tionchar idirghabhálacha beartais.”
Dúirt Kerrie Sheehan, Ceannasaí Taighde, Nuálaíochta agus Leictreachais, SEAI: “Tá Éire ar cheann de na tíortha is mó san Eoraip atá ag brath ar bhreosla iontaise dár riachtanais fuinnimh. Príomhbheart chun an ró-spleáchas seo a sheachaint is ea turais ghluaisteáin gan ghá a laghdú agus roghanna inbhuanaithe comhroinnte a chur ar fáil níos forleithne. Tá ríméad ar SEAI tacú leis an tionscadal taighde seo a dhéanann trialacha iompair taistil ar fud na hÉireann. Cuideoidh soláthar moil soghluaisteachta leictrí le hathrú chuig roghanna fuinnimh inbhuanaithe mar mhodhanna iompar. Roinnfear eolas agus sonraí ón tionscadal le raon leathan páirtithe leasmhara a mbeidh baint acu le cinnteoireacht amach anseo maidir le fuinneamh glan san iompar.”
Dúirt Brendan Grieve, Bainisteoir Ginearálta Enterprise Mobility Ireland: “Tá lúcháir orainn a bheith mar chuid d’fheidhmiú céimneach an mhoil soghluaisteachta i nGaillimh agus moil bhreise ar fud na tíre sna míonna atá amach romhainn. Táimid ar bís tacú leis an tionscadal seo a chuirfidh réitigh bhreise soghluaisteachta ar fáil do mhuintir na háite agus do chuairteoirí agus a chuirfidh ar chumas daoine triail a bhaint as cineálacha éagsúla roghanna soghluaisteachta nach mbíonn siad ag smaoineamh orthu de ghnáth nó nach mbíonn teacht acu orthu de ghnáth.”
Tá ballraíocht bhliana saor in aisce (€40 de ghnáth) agus creidmheas tiomána €10 á thairiscint ag Enterprise Car Club do bhaill nua ag an nasc seo a leanas https://www.enterprisecarclub.ie/ESBHub.
Chun na rothair leictreacha a chur in áirithe, téigh chuig leathanach gréasáin an tionscadail ROBUST chun tuilleadh eolais a fháil faoin aip atá ag teastáil.
Le haghaidh tuilleadh eolais, téigh chuig leathanach gréasáin an tionscadail ROBUST
