Cuireann an tSeachtain um Aosú Dearfach deis bhliantúil ar fáil chun aird a tharraingt ar na gnéithe dearfacha a bhaineann le haosú agus chun ceiliúradh a dhéanamh ar an méid luachmhar a chuireann daoine scothaosta lenár bpobail. Is é téama na Seachtaine um Aosú Dearfach 2024 "Athchóiriú a Dhéanamh ar an Smaoineamh, ar an Mothú agus ar an nGníomh i dTreo Aosú agus Daoine Scothaosta."
I mbliana, ón 30 Meán Fómhair go dtí an 6 Deireadh Fómhair, tá aird á tarraingt ag Gaillimh ar 27 duine den scoth as gach cearn den Chathair agus den Chontae a léiríonn na gnéithe dearfacha a bhaineann le haosú. Cuireann na daoine seo, trína gcuidiú ciúin ach éifeachtach, feabhas leanúnach ar ár saol, ár gcomharsanachtaí agus ár bpobail.
Is é croílár an cheiliúrtha seo Taispeántas na Laochra Áitiúla, a sheolfar i Músaem Cathrach na Gaillimhe an 1 Deireadh Fómhair. Tar éis é a sheoladh, rachaidh an taispeántas chuig leabharlanna éagsúla agus chuig áiteanna eile ar fud na Cathrach agus an Chontae, ag taispeáint na 27 duine inspioráideacha seo a léiríonn aosú dearfach, sláintiúil agus gníomhach, ag léiriú na ndaoine gan áireamh a aithnímid inár dtuismitheoirí, inár siblíní, inár ngaolta, inár gcomharsana, inár saorálaithe pobail, inár gcúramóirí agus inár gcairde a shaibhríonn ár saol ar bhealaí gan áireamh.
Tionscnamh de chuid Chlár Aoisbhá na Gaillimhe is ea Taispeántas na Laochra Áitiúla, atá indéanta trí thacaíocht ó Chomhairlí Cathrach agus Contae na Gaillimhe, COPE na Gaillimhe, Forbairt Tuaithe na Gaillimhe, agus Comhpháirtíocht Chathair na Gaillimhe. Gabhaimid buíochas ó chroí le gach duine a rinne urraíocht nó a chuir le tionscnaimh na bliana seo, agus go háirithe leis na daoine iontacha ó gach cearn de Chathair agus de Chontae na Gaillimhe a chuireann lenár dteaghlaigh, lenár bpobail agus leis an tsochaí, a spreagann daoine eile chun an rud céanna a dhéanamh.
Chun tuilleadh eolais a fháil ar an tSeachtain um Aosú Dearfach, tabhair cuairt ar www.copegalway.ie/positiveageingweek.